Haur eta nerabeentzako laguntza eta babesari, eta familia, adingabeen eskubideak eta berdintasuna sustatzeari buruzko Foru Legearen aurreproiektua

Espainiako Konstituzioaren 39. artikuluaren arabera, botere publiko guztiek familiaren babes soziala, ekonomikoa eta juridikoa bermatzeko betebeharra dute, bai eta adingabeen babes integrala segurtatzekoa ere, adingabeen eskubideak zaintzen dituzten nazioarteko akordioetan ezarrita baitago babes hori; akordio horien artean, nabarmentzekoa da Haurren Eskubideei buruzko Konbentzioa, Nazio Batuen Batzar Nagusiak 1989ko azaroaren 20an onartua.

Esparru horren barruan, eta adingabeen eskubideak babesteko helburu horrekin, egokia da haien babesa indartzea, Haurrentzako eta nerabeentzako sustapenari, laguntzari eta babesari buruzko abenduaren 5eko 15/2005 Foru Legearen xedapenak eguneratuz eta Familiari, Haurrei eta Nerabeei Laguntzeko II. Planaren ildoak txertatuz.

Lege-aurreproiektuaren zirriborroa egiteko prozesuan, hainbat pertsona-talderekin lan egin da, prozesu horretan ordezkaritza eta ahots propioa izan ditzaten honako hauek: haurrek eta nerabeek, haurrak eta nerabeak biltzen dituzten erakundeek, adingabeak babesten eta artatzen dituzten erakundeek, toki-erakundeek, oinarrizko gizarte-zerbitzuek, desgaitasuna duten pertsonak ordezkatzen dituzten erakundeek, gizarte-bazterkeriako egoeran edo arriskuan dauden pertsonak ordezkatzen dituztenek, gazte elkarteek, ordezkari sindikalek, Gizain fundazioko ordezkariek (adingabeak babesteko zerbitzuen kudeatzailea den aldetik) eta gehien eragindako departamentuek, hala nola Eskubide Sozialetako Departamentuak, Pertsonen Autonomiarako eta Garapenerako Nafarroako Agentziak, Hezkuntza Departamentuak eta Osasun Departamentuak. Aldi berean, ekarpenak egin dituzte hauexek: NABIk, Nafarroako Foru Ogasunak, Migrazio Politiketako Zuzendaritza Nagusiak, Justizia Zuzendaritza Nagusiak, Unibertsitateko Zuzendaritza Nagusiak, Etxebizitza Zuzendaritza Nagusiak eta Nafarroako Adingabearen Kontseiluak.